Transmetuesit kombëtarë të Irlandës, Spanjës dhe Sllovenisë kanë vendosur të mos e transmetojnë Konkursin e Këngës në Eurovision, duke bojkotuar ngjarjen për shkak të pjesëmarrjes së Izraelit.
Transmetuesi publik slloven RTV Slovenia konfirmoi të enjten se nuk do të transmetojë festivalin, ndërsa në vend të tij do të shfaqë një seri filmash dhe dokumentarësh kushtuar Palestinës. Vendimi vjen në një klimë të tensionuar politike dhe mes kritikave të vazhdueshme ndaj organizatorëve të Eurovisionit për lejimin e pjesëmarrjes së Izraelit.
Edhe transmetuesit publikë në Irlandë dhe Spanjë kanë marrë të njëjtin vendim, duke refuzuar transmetimin e konkursit si formë proteste. Sipas raportimit të The Guardian, vendimi është pjesë e një presioni në rritje ndaj organizatorëve të festivalit që të rishqyrtojnë pjesëmarrjen e Izraelit, për shkak të luftës në Gaza dhe situatës humanitare në territorin palestinez.
Eurovisioni, një nga eventet më të ndjekura televizive në Europë, prej muajsh është shoqëruar me debate të forta politike. Aktivistë dhe disa artistë kanë kërkuar përjashtimin e Izraelit nga gara, ndërsa organizatorët kanë mbrojtur qëndrimin se konkursi duhet të mbetet një aktivitet kulturor dhe jo politik.
Megjithatë, vendimi i tre transmetuesve publikë për të mos e transmetuar festivalin tregon se tensioni rreth pjesëmarrjes së Izraelit po reflektohet gjithnjë e më shumë edhe në mediat publike europiane.
