Revista ndërkombëtare e artit The Art Newspaper ka publikuar renditjen e 100 muzeve më të vizituar në botë për vitin 2025, duke ofruar një panoramë të qartë të flukseve turistike dhe të peshës kulturore të vendeve në skenën globale.
Në krye të listës qëndron sërish Muzeu i Luvrit në Paris, i cili ka regjistruar mbi 9 milionë vizitorë gjatë vitit të kaluar. Kjo ndodh pavarësisht krizës së shkaktuar nga vjedhja e bujshme e bizhuterive në tetor dhe dorëheqjes së drejtoreshës Laurence des Cars, e cila u zëvendësua nga Christophe Leribault.
Në vendin e dytë renditen Muzetë e Vatikanit me më shumë se 6.9 milionë vizitorë.
Surpriza më e madhe e këtij viti vjen nga Azia: Muzeu Kombëtar i Koresë në Seul është ngjitur në vendin e tretë me rreth 6.5 milionë vizitorë, duke lënë pas Muzeun Britanik të Londrës që renditet i katërti.
Në dhjetëshen e parë përfshihen edhe disa nga institucionet më të njohura të artit në botë, si Metropolitan Museum of Art në Nju Jork, Tate Modern dhe National Gallery në Londër, si dhe Shanghai Museum East në Kinë.
Raporti thekson se vizitat në muze janë stabilizuar pas ndikimit të pandemisë së Covid-19, duke arritur një total prej mbi 200 milionë vizitash vetëm në 100 muzetë kryesorë gjatë vitit 2025.
Ndërkohë, rritja më e fortë është regjistruar jashtë Evropës. Azia dhe Amerika Latine po shfaqen gjithnjë e më shumë si qendra të reja të turizmit kulturor. Në Seul, Muzeu Kombëtar i Koresë ka regjistruar një rritje spektakolare prej mbi 70%, duke kaluar nga 3.8 milionë vizitorë në vitin 2024 në 6.5 milionë në vitin 2025.
Edhe në Evropë muze të rëndësishëm vazhdojnë të tërheqin vizitorë në numra të mëdhenj. Muzeu Prado në Madrid ka kaluar për herë të parë shifrën e 3.5 milionë vizitorëve, ndërsa kompleksi i muzeve Uffizi në Firence ka arritur në 5.3 milionë vizita gjatë vitit 2025.
Sipas raportit, rritja e interesit për kulturën koreane – nga muzika K-pop te industria e kozmetikës – po ndikon edhe në turizmin kulturor, duke tërhequr gjithnjë e më shumë vizitorë drejt muzeve dhe trashëgimisë historike të vendit.
Në Shtetet e Bashkuara, muzeu më i vizituar mbetet Metropolitan Museum of Art në Nju Jork me afro 6 milionë vizitorë, ndërsa në Amerikën Latine kryeson Muzeu Kombëtar i Antropologjisë në Mexico City me një rekord prej 5.1 milionë vizitorësh.
Raporti konkludon se, ndërsa institucionet në Evropë dhe SHBA kanë mbetur relativisht të qëndrueshme në numra, rritja më dinamike e muzeve dhe e vizitorëve po ndodh në Azi dhe në Amerikën Latine, duke ndryshuar gradualisht hartën kulturore të botës.
