Ndërsa armëpushimi mbetet në fuqi, Irani nuk e konsideron ende të përfunduar konfliktin, deklaroi një zëdhënës ushtarak iranian në një prononcim për televizionin shtetëror, të raportuar menjëherë pas një postimi të fundit të Donald Trump në rrjetet sociale.
“Situata vazhdon të trajtohet si kohë lufte dhe baza e të dhënave mbi objektivat dhe pajisjet ushtarake është përditësuar”, u shpreh zëdhënësi.
Duke iu referuar situatës në Ngushticën e Hormuzit, ai sqaroi gjithashtu ndarjen e kontrollit mes strukturave ushtarake iraniane, përkatësisht forcave të rregullta dhe Gardës Revolucionare.
Sipas tij, pjesa perëndimore e ngushticës administrohet nga Garda Revolucionare, ndërsa pjesa lindore nga ushtria e rregullt e Republikës Islamike.
Ndërkohë, Presidenti amerikan Donald Trump ka deklaruar në mënyrë të përsëritur se udhëheqja iraniane është e përçarë nga brenda dhe se nuk është e qartë se kush ushtron realisht kontrollin mbi vendin.
