Një influencër polak ka arritur të mbledhë më shumë se 250 milionë zloty (mbi 50 milionë paund) për një fondacion që ndihmon fëmijët me kancer, pas një transmetimi të pandërprerë në internet që zgjati nëntë ditë.
Ylli i YouTube Piotr Hancke, i njohur për ndjekësit e tij si Latwogang, e realizoi këtë nismë duke transmetuar drejtpërdrejt nga një apartament në Varshavë.
Transmetimi, që përfundoi të dielën, u mbështet nga disa figura të njohura ndërkombëtare, mes tyre këngëtari i Coldplay, Chris Martin, portieri polak Wojciech Szczęsny dhe talenti i ri i futbollit spanjoll, Lamine Yamal.
Yamal u shfaq në një video të Szczęsny për të mbështetur fushatën, e cila ishte në ndihmë të fondacionit polak Cancer Fighters Foundation (CFF).
Gjatë gjithë transmetimit, 23-vjeçari dëgjoi vazhdimisht një këngë bamirësie të regjistruar nga reperi polak Bedoes 2115. Kënga, e shkruar si një “diss track” kundër kancerit, përfshin edhe zërin e një fëmije që po lufton me sëmundjen.
Chris Martin u lidh me një videothirrje dhe interpretoi një fragment të shkurtër muzikor, duke kërkuar edhe ndjesë për përpjekjen e tij për të folur në polonisht.
Në nismë morën pjesë edhe shumë figura të tjera të sportit dhe të mediave sociale në Poloni. Futbollisti Robert Lewandowski publikoi në TikTok një video ku kërcente me këngën e fushatës dhe më pas shkroi në Instagram se ishte “krenar që është polak”.
Disa nga të ftuarit e njohur rruajtën kokën në shenjë solidariteti me pacientët me kancer, ndërsa edhe vetë Latwogang bëri të njëjtën gjë gjatë transmetimit.
Në kulmin e saj, transmetimi u ndoq njëkohësisht nga rreth 1.4 milionë njerëz. Deri tani, fondacioni ka konfirmuar se janë mbledhur më shumë se 52 milionë paund, një shumë më shumë se trefishi i rekordit të mëparshëm botëror për një livestream bamirësie.
Fondacioni ka hapur edhe një faqe të posaçme për të publikuar në mënyrë transparente përdorimin e fondeve, duke theksuar se çdo kontribut do të kthehet në ndihmë reale për fëmijët që luftojnë çdo ditë me kancerin.
[3:24 PM, 4/28/2026] Desada Metaj: Një influencër 23-vjeçar nga Polonia arriti të mbledhë mbi 50 milionë paund për fëmijët me kancer, pas një livestreami maratonë që zgjati 9 ditë pa ndërprerje.
Në nismë u përfshinë edhe emra të mëdhenj si Lamine Yamal, Chris Martin dhe Robert Lewandowski, ndërsa në kulmin e saj transmetimi u ndoq njëkohësisht nga 1.4 milionë njerëz.
Një rekord i ri bamirësie në internet.
