Një këshilltar i lartë i liderit suprem iranian ka paralajmëruar se aleatët e Teheranit mund të mbyllin rrugën detare strategjike Bab el-Mandeb Strait, ashtu siç Irani ka bërë efektivisht me Strait of Hormuz.
Deklarata u bë nga Ali Akbar Velayati, ish-ministër i jashtëm i Iranit dhe një figurë me ndikim në establishmentin iranian. Në një mesazh në rrjetin X, ai paralajmëroi se “komanda e bashkuar e frontit të Rezistencës e sheh Bab al-Mandebin njësoj si Hormuzin”.
Sipas tij, nëse Shtëpia e Bardhë përsërit “gabimet e saj të pamenda”, rrjedha e energjisë dhe tregtisë globale mund të ndërpritet shumë shpejt.
Ngushtica Bab al-Mandeb, që lidh Detin e Kuq me Gjirin e Adenit dhe më pas me Oqeanin Indian, është një nga rrugët më të rëndësishme detare në botë për tregtinë e naftës. Nëpër të kalon rreth 5 për qind e furnizimit global me naftë, ndërsa së bashku me ngushticën e Hormuzit përbëjnë një korridor jetik për energjinë botërore.
Ekspertët paralajmërojnë se nëse të dyja ngushticat do të mbylleshin njëkohësisht, do të bllokohej rreth një e katërta e furnizimit global me naftë dhe gaz, si dhe një pjesë e madhe e tregtisë së Azisë drejt Evropës.
Zona kontrollohet në praktikë nga rebelët Houthis në Jemen, aleatë të Iranit, të cilët më herët kanë treguar se janë në gjendje të godasin anije dhe të ndërpresin trafikun detar në Detin e Kuq.
Analistët paralajmërojnë se një bllokim i Bab al-Mandebit do të krijonte një “skenar makthi” për tregtinë globale, duke përkeqësuar krizën energjetike dhe duke goditur furnizimet drejt Evropës.
