Teherani ka reaguar ndaj një plani amerikan me 15 pika për përfundimin e luftës, duke e cilësuar atë “tepër ambicioz, të pazakontë dhe jologjik”.
Zëdhënësi i Ministrisë së Jashtme të Iranit, Esmail Baghaei, deklaroi se Irani ka përfunduar kërkesat e tij në lidhje me propozimet e fundit për t’i dhënë fund konfliktit, por se ato do të bëhen publike vetëm në momentin e duhur. Sipas tij, Teherani nuk do t’i nënshtrohet presionit.
Sipas agjencisë shtetërore IRNA, Baghaei tha se pak ditë më parë propozimet janë përcjellë përmes ndërmjetësve dhe se plani amerikan me 15 pika është transmetuar përmes Pakistanit dhe disa vendeve të tjera mike.
Ai theksoi se Irani ka kornizën e vet për negociatat. “Bazuar në interesat dhe vlerësimet tona, kemi hartuar paketën e kërkesave që kemi pasur dhe kemi,” tha Baghaei.
Zëdhënësi i diplomacisë iraniane hodhi poshtë gjithashtu idenë se angazhimi me ndërmjetësit tregon dobësi. Sipas tij, fakti që Republika Islamike e Iranit paraqet shpejt dhe hapur qëndrimet e saj ndaj një plani nuk duhet të konsiderohet si shenjë dorëzimi.
“Që nga momenti kur u ngrit kjo çështje, ne kemi formuluar përgjigjet tona. Kur të jetë e nevojshme, do t’ju informojmë qartë,” përfundoi ai.
