Krahu i armatosur i Hamasit njoftoi sot se ngritja e çështjes së çarmatimit të tij në një “mënyrë të vrazhdë” është një përpjekje për të vazhduar gjenocidin, siç e quajti ai, ndaj popullit palestinez.
Në një deklaratë të transmetuar në televizion, zëdhënësi i krahut të armatosur të organizatës palestineze tha se nuk do të pranonte kërkesa të tilla, të cilat i përshkroi si “të papranueshme” në “asnjë rrethanë”.
Çfarë parashikon plani i Këshillit të Paqes i Trump?
Kujtojmë se Këshilli i Paqes paraqiti planin e Donald Trump për Gazën në mars. Plani ndjek një afat kohor që fillon me marrjen e kontrollit të sigurisë së Gazës nga një komitet teknokratësh palestinezë, të mbështetur nga SHBA-të, dhe përfundon me tërheqjen e plotë të forcave izraelite “pasi të konfirmohet se Gaza është e lirë nga armët”.
Çarmatimi i Hamasit mbetet një problem kritik në bisedimet për të zbatuar planin e Trump për Gazën dhe për të konsoliduar armëpushimin e tetorit që ndërpreu dy vjet luftë. Hamasi ka refuzuar prej kohësh kërkesat për të dorëzuar armët, të cilat vlerësohet se janë transportuar dhe ruajtur kryesisht në tunele në Gaza. Izraeli thotë se nuk do të pranojë të tërhiqet nga Gaza nëse Hamasi nuk çarmatoset plotësisht.
Plani i Këshillit të Paqes përfshin dy komponentë: një dokument me 12 pika të titulluar “Hapat për të Përfunduar Zbatimin e Planit Gjithëpërfshirës të Paqes të Trump për Gazën” dhe një afat kohor prej pesë fazash gjatë të cilit Hamasi do të dorëzojë armët e tij gjatë një periudhe tetëmujore.
Dokumenti thotë se të gjitha fraksionet e armatosura në Gaza, përfshirë organizata të tilla si Xhihadi Islamik, do të marrin pjesë në një proces çarmatimi të mbikëqyrur nga teknokratët palestinezë, një grup i njohur si Komiteti Kombëtar për Administrimin e Gazës (NCAG).
“Gaza do të qeveriset në bazë të parimit të ‘një autoriteti, një sistemi ligjor, një ushtrie’, ku vetëm personat e autorizuar nga (NCAG) mund të posedojnë armë dhe të gjitha fraksionet e armatosura do të ndërpresin aktivitetet ushtarake”, sipas dokumentit.
Procesi i çarmatimit do të “verifikohet nga Komisioni i Verifikimit të Grumbullimit të Armëve”, një organ që do të krijohet nga Nickolay Mladenov, i dërguari kryesor në Këshillin e Paqes, sipas dokumentit.
Rindërtimi do të lejohet vetëm në zonat që janë përcaktuar si të demilitarizuara, thotë dokumenti. Plani 12-pikësh nuk përmend krijimin e një shteti palestinez ose pavarësinë.
Sipas afatit kohor të planit, në fazën e parë, e cila përfshin 15 ditë, NCAG do të marrë kontrollin e sigurisë dhe administrativ të Gazës dhe do të fillojë hapat përgatitorë për mbledhjen e armëve.
Në fazën e dytë, ditët 16-40, Izraeli do të largojë të gjitha armët e rënda nga zonat nën kontrollin e tij, duke përfshirë artilerinë e rëndë dhe automjetet e blinduara, dhe do të vendoset një forcë ndërkombëtare sigurie.
Faza e tretë, ditët 31-90, do të jetë më intensivja: Hamasi do t’ia dorëzojë të gjitha armët e tij të rënda dhe pajisjet ushtarake NCAG-ut dhe “do të lejojë shkatërrimin e të gjitha tuneleve, eksplozivëve dhe infrastrukturës ushtarake”.
Në fazën e katërt, ditët 91-250, forcat policore të NCAG-ut do të mbledhin dhe regjistrojnë të gjitha armët e mbetura, përfshirë pushkët. Forcat izraelite fillojnë të tërhiqen në faza.
Faza e pestë përshkruhet si “verifikimi përfundimtar” i çarmatimit, dhe në këtë fazë “forcat izraelite tërhiqen plotësisht nga Gaza, përveç pranisë së tyre në një perimetër sigurie, dhe fillojnë përpjekjet për rindërtim gjithëpërfshirës”.
