Një sulm ajror izraelit në veri të Rripit të Gazës vrau katër palestinezë të dielën, sipas autoriteteve lokale shëndetësore, në një tjetër incident që rrezikon një armëpushim tashmë të brishtë, ndërsa ndërmjetësit po përpiqen ta forcojnë marrëveshjen.
Sipas mjekëve, sulmi goditi një grup njerëzish në rrugën Jafa, pranë lagjes Darraj në qytetin e Gazës, duke vrarë katër persona dhe duke plagosur disa të tjerë.
Nga ana e saj, ushtria izraelite tha se forcat e saj në veri të Gazës kishin goditur dhe vrarë anëtarë të një qelize militante palestineze që po vepronin pranë trupave izraelite dhe përbënin një kërcënim të menjëhershëm.
Lufta e akuzave mes Hamasit dhe Izraelit për shkelje të armëpushimit që hyri në fuqi tetorin e kaluar vazhdon. Marrëveshja i dha fund dy viteve të luftimeve të hapura, por tensionet mbeten të larta.
Sipas Ministrisë së Shëndetësisë në Gaza, të paktën 700 palestinezë janë vrarë nga zjarri izraelit që nga fillimi i armëpushimit. Izraeli nga ana tjetër thotë se katër ushtarë izraelitë janë vrarë nga militantët në Gaza gjatë të njëjtës periudhë.
Ndërkohë, një delegacion i Hamasit u takua në Kajro me ndërmjetës nga Egjipti, Katari dhe Turqia për të diskutuar një propozim për çarmatim të paraqitur muajin e kaluar.
Sipas burimeve diplomatike, Hamasi ka bërë të qartë se nuk do të diskutojë dorëzimin e armëve pa garanci që Izraeli do të tërhiqet plotësisht nga Gaza, siç parashikohet në planin e paqes të propozuar nga presidenti amerikan Donald Trump.
