Oficerët e Zyrës Kombëtare të Policisë kundër Korrupsionit dhe Krimit të Organizuar të Kroacisë kanë arrestuar ministrin e Shëndetësisë, Vili Berosh, këtë mëngjes në shtëpinë e tij në Zagreb.
Sipas raportimeve të mediave lokale, arrestimi është pjesë e një hetimi të gjerë lidhur me korrupsionin, i cili fokusohet në blerjen e pajisjeve mjekësore për spitalet e vendit. Hetimi ka të bëjë me blerjen e mikroskopëve për neurokirurgjinë për të cilët dyshohet se janë paguar çmime më të larta se vlera reale.
Ky hetim ka shkaktuar tronditje në politikën kroate, pasi Vili Berosh ka qenë një figurë kyçe në administratën e shëndetësisë. Ende nuk ka informacione të plota lidhur me detajet e akuzave, por hetimi është duke u zhvilluar dhe priten zhvillime të tjera.
