Presidenti i zgjedhur Donald Trump njoftoi të mërkurën se ka emëruar ligjvënësin e Floridës, Matt Gaetz për të shërbyer si prokuror i përgjithshëm.
Duke zgjedhur përfaqësuesin Matt Gaetz si kandidat për postin e prokurorit të përgjithshëm, Presidenti i zgjedhur Donald Trump po synon të emërojë një aleat të fortë, i cili është parë si përçarës edhe brenda partisë së tij.
Nuk ishte një nga emrat kryesorë që konsiderohej si kandidat i mundshëm për këtë post; emërimi i Gaetz u publikua fillimisht në rrjetin social të Trump, në vend të një njoftimi më formal nga ekipi i tij i tranzicionit, siç kishte bërë për shumicën e zgjedhjeve të tij të mëparshme.
Kryetari i Dhomës së Përfaqësuesve, Mike Johnson, tha se Gaetz dha dorëheqjen nga Kongresi të mërkurën, që do të thotë se hetimi i vazhdueshëm i Komitetit të Etikës për akuzat kundër Gaetz për trafikim të fëmijëve për qëllime seksuale do të mbyllet, dhe nuk do të publikohet ndonjë raport.
Ja disa gjëra që duhen ditur për Gaetz:
Ai ka pasur çështje të veta ligjore
Komiteti i Etikës së Dhomës së Përfaqësuesve ka hetuar akuzat se Gaetz ishte pjesë e një skeme që çoi në trafikimin seksual të një vajze 17-vjeçare, një hetim që përfundoi të mërkurën me dorëheqjen e tij nga Dhoma e Përfaqësuesve.
Në qershor, komiteti dha një përditësim të pazakontë publik mbi shqyrtimin e çështjes, ku përmendte gjithashtu nëse Gaetz ishte përfshirë në sjellje seksuale të papërshtatshme dhe përdorim të paligjshëm të drogës, pranonte dhurata të papërshtatshme dhe përpiqej të pengonte hetimet e qeverisë për sjelljen e tij.
Komiteti njoftoi gjithashtu se nuk po hetonte më katër akuza të tjera që përfshinin kongresmenin, si ajo që ai kishte ndarë imazhe ose video të papërshtatshme me kolegët në sallën e Dhomës së Përfaqësuesve, ose se kishte pranuar një ryshfet ose kishte përdorur fonde të fushatës për qëllime personale.
Gaetz i ka mohuar në mënyrë kategorike të gjitha akuzat, të cilat ai i ka quajtur sulme nga ish-Kryetari i Dhomës, Kevin McCarthy, një armik i tij i vjetër, edhe pse hetimi kishte nisur para se McCarthy dhe republikanët të merrnin shumicën në Dhomë. Në vitin 2023, Departamenti i Drejtësisë përfundoi një hetim për trafikim seksual pa ngritur akuza kundër Gaetz.
Ka qenë besnik ndaj Trump dhe ka përsëritur sulmet e tij ndaj ‘shtetit të thellë’
Sapo ka fituar mandatin e tij të pestë si përfaqësues i një pjese të madhe të Panhandle-it të Floridës, Gaetz, 42 vjeç, ka qenë një mbrojtës i shpeshtë i Trump në kanalet televizive.
Në debatin e Trump-it të qershorit me Presidentin Joe Biden, Gaetz ishte në qendër të vëmendjes në dhomën e PR, duke lavdëruar arritjet e Trump. Pas largimit të Biden nga gara, Gaetz ishte ndër ata që ndihmuan Trump të përgatitej për debatin e tij të mëvonshëm me Zëvendës-Presidenten Kamala Harris, ku ish-presidenti bëri pretendime të rreme se emigrantët haitianë hanin kafshët shtëpiake dhe kafshë të tjera – pretendime që Gaetz, ndër të tjerë, kishte përhapur në internet.
Disa orë para se Trump të njoftonte kandidaturën e tij, Gaetz postoi në X një deklaratë që pasqyronte pretendimet e shpeshta të Trump se ai ishte trajtuar padrejtësisht nga sistemi i drejtësisë.
“Duhet të kemi një presion të plotë kundër kësaj qeverie të ARMATOSUR që është kthyer kundër popullit tonë,” tha Gaetz. “Dhe nëse kjo do të thotë të SHKATËRROJMË çdo agjenci me tre shkronja, nga FBI te ATF, jam gati të filloj!”
Nëse konfirmohet si prokuror i përgjithshëm, Gaetz do të kishte mbikëqyrje mbi të dyja këto agjenci.
Associated Press
