Kryetari i Rithemelimit, Sali Berisha, ka vijuar sulmet edhe ditën e sotme ndaj drejtuesit të SPAK, Altin Dumani, në protestën e zakonshme poshtë ballkonit të shtëpisë së tij. Ai ka akuzuar kreun e SPAK se ka dërguar shumë pak çështje për korrupsion.
“Nuk ka mashtrim më të madh se të besosh se Zamani po lufton korrupsionin. A mund t’u jap vetëm një shifër? Vetëm një shifër sonte të marrë nga raportet e Departamentit të Shtetit për vitin 2010-2011. Çfarë thonë këto raporte? Këto raporte thonë se në vitin 2008-2009, Dumani që ishte në prozhektorët e fuqishëm të ekipit ku punonte, kishte regjistruar bashkë me ekipin 1414 çështje për korrupsion. Kurse Dumani i marrë peng, Dumani që ka shitur veten, gjatë viteve 2022-2023 ka regjistruar afera për korrupsion gjithsej 4.8 herë më pak ose 392 çështje në dy vite.
Po pse kjo? Sepse regjistron vetëm ato që i dikton Edi Rama. Dhe ky faqezi që nuk ka nder, që nuk ka dinjitet, që rri në post në kundërshtim flagrant me Kushtetutën, rri në post i pavotuar sipas Kushtetutës. Shqiptarët duhet ta dinë se ky Altin Faqeziu i partisë ka dërguar në një vit, në vitin 2023, gjithsej 38 dosje për korrupsion kundrejt 154 dosjeve që ka dërguar kur kryesonte task-forcën” – tha Berisha.
Në fjalën e tij, Berisha gjithashtu tha se denoncimi i bërë nga PD, për inceneratorin e Tiranës është bërë si grup i strukturuar kriminal, duke e quajtur kështu gënjeshtar Dumanin.
“Një peng i shpifur i Edi Ramës. Mashtrues publik që gënjeu, tha se për inceneratorin nuk është bërë padi për grup të strukturuar, në një kohë kur 4 vite më parë, padia është bërë për padi të strukturuar kriminal. Pengu i Edi Ramës. Sot i doli çdo bojë, i doli çdo kallaj” – u shpreh Berisha.
Por sa i përket padisë për inceneratorin e Tiranës, gënjeshtar del kreu i Rithemelimit. Për rikujtesë, padia është bërë në vitin 2022 nga Jorida Tabaku në cilësinë e kryetares së Komisionit Hetimor për Inceneratorët dhe nuk ka qenë si grup i strukturuar kriminal. Madje padia u firmos nga deputetët që ishin asokohe në grupin e Lulzim Bashës, ndërsa pjesa tjetër që kishte kaluar që atëherë me Berishën, nuk e firmosën padinë e çuar në SPAK.
