Prokuroria e Posacme Kundër Korrupsionit dhe Krimit të Organizuar nis hetimin pasuror për kryebashkiakun Erjon Veliaj dhe familjarët e tij.
Në kuadër të këtij procedimi SPAK ka kërkuar informacion në të gjitha bankat e nivelit të dytë për llogaritë bankare që zotëron kryebashkiaku Veliaj, si dhe transansionet që ai ka kryer së fundmi.
E njëjta gjë është kërkuar edhe për bashkëshorten e tij, Ajola Xoxa, vëllain e Veliajt, Arbër Veliaj dhe nënën e tij Shqiponja Veliaj.
Sipas urdhrit të prokurorit Ols Dado, bankat e nivelit të dytë, por edhe institucionet e tjera, duhet t'i dorëzojnë SPAK të gjithë dokumentacionin e nevojshëm.
Burimet thonë se për shkak të këtij hetimi janë sekuestruar dhe disa celularë, përfshirë dhe të një personi shumë pranë Ajola Xoxës, bashkëshortes së kryebashkiakut.
Erjon Veliaj u thirr disa kohë më parë në SPAK, për t'u marrë në pyetje për aferën e inceneratorit të Tiranës. Përgjatë ditëve të fundit, oficerët e BKH kanë marrë dhjetra dokumenta nga Bashkia, që mendohet se i shërbejnë hetimit.
SPAK po ashtu po heton për rolin e Veliajt edhe në lidhje me dosjen 5D, ku 3 prej drejtorëve më të rëndësishëm të Bashkisë, Redi Molla, Mariglen Qato dhe Taulant Tusha kanë përfunduar prapa hekurave, nën dyshimet për korrupsion, pastrim parash apo shpërdorim të detyrës.
