Kreu i PD-së ftoi të gjithë qytetarët shqiptarë të bashkohen në protestën e 26 nëntorit në Tiranë.
“Në datë 26 është protesta tjetër kombëtare, më e fuqishme që ka njohur Shqipëria. Ndaj ftoj shqiptarët, në datën 26 marshim në Tiranë. E gjithë Shqipëria në Tiranë. Mosbindja civile është rruga e vetme e ndarjes nga kjo diktaturë,” tha Berisha.
Megjithatë, ideja e mosbindjes civile duket disi kontradiktore në kushtet kur deputetët e PD-së morën pjesë në punimet e Kuvendit dhe në debatet për buxhetin e ri. Pas vendimit për protestë dhe rikthimin e “mosbindjes civile,” mbetet e paqartë se çfarë qëndrimi do të mbajë grupi parlamentar i PD-së.
Ndërkohë, gjatë një konference për shtyp, Berisha përjashtoi mundësinë që demokratët të propozojnë një kandidat tjetër për kryeministër. “Sali Berisha nuk pranoi këtë kur e synoi administrata që po largohet nga pushteti në Shtetet e Bashkuara, dhe do ta pranojë nga Edi Rama? Edhe po të firmosin 150 vetë, nuk mund t’ia caktojnë kurrë opozitës kryetarin,” deklaroi ai.
