Fjalët për mundësinë e një mase nga SPAK për kryetarin e bashkisë së Tiranës duket se kanë rënë dhe në veshët e ministrit Blendi Gonxhe. Duke paralajmëruar zëvendësimin e Erion Veliajt si drejtues qarku i Tiranës, Gonxhe ka postuar një foto ku bashkë me Ogerta Manastirliun janë duke drejtuar një nga mbledhjet për fushatën në Tiranë.
“Me kolegen @manastirliu.ogerta për angazhimin e ri politik në Tiranë, ku rrisim forcat për qarkun lokomotivë dhe fuqizojmë organizimin në çdo njësi” - shkruan Gonxhe në profilin e tij në Instagram, teksa e projekton veten si koleg i ministres së Arsimit si drejtues politik i qarkut të Tiranës.
Termi “koleg” u bë i famshëm kur Erion Veliaj pas njërës prej daljeve në SPAK iu drejtua prokurorëve si “kolegët” e tij. Epitet që tani mesa duket e ka marrë në përdorim dhe Gonxhe. Me shpresën se do t’i duhet ta përdorë vetëm në krah të koleges Manastirliu dhe jo te “kolegët” e Veliajt në SPAK. Fakt mbetet që ky i fundit prej ditësh nuk është shfaqur në takime elektorale në qarkun e Tiranës ku është drejtues politik i PS bashkë me Elisa Spiropalin dhe Ogerta Manastirliun.
