Pas vrasjes së Martin Canit, në rrjete sociale u shpërndanë foto të autorit të dyshuar, thikës së krimit dhe detaje të tjera. Po ashtu u bë thirrje për dhunë. Policia ka identifikuar autorin dhe është një tjetër 16-vjeçar me banim në SHBA. Njoftimi Në lidhje me një video të publikuar në një portal, ditën e djeshme, Policia e Tiranës ka informuar se Specialistët e Sektorit për Hetimin e Krimeve Kibernetike të DVP Tiranë, menjëherë pas publikimit të pamjeve filmike, kanë identifikuar shtetasin 16 vjeç që shfaqet në video, i cili banon në SHBA. Në vijim të veprimeve për rastin, janë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për fillimin e procedimit penal, për 16-vjeçarin. Ky shtetas, nëpërmjet rrjeteve sociale, ka bërë thirrje për nxitje të urrejtjes ose grindjeve, për mbajtje të armëve të ftohta nga fëmijët dhe për përdorimin e tyre në konflikte. Materialet procedurale i kaluan Prokurorisë, për veprën penale "Nxitja e urrejtjes ose grindjeve", parashikuar nga neni 265 i Kodit Penal.
