Arrestohen 4 punonjës policie në Shkodër pas masakrës së Dobraçit me 4 të vrarë. Oficerët e policisë Blerim Kurmekaj, Viktor Logu, Julian Sterkaj dhe Marte Martini dyshohen për veprën penale të shpërdorimit të detyrës, pas një referimi të bërë nga Agjencia e Mbikëqyrjes Policore. Në Dobraç, gjatë një atentati mafioz, u ekzekutuan Hamza Lici, vëllai i të shumëkërkuarit Ibrahim Lici, i përfshirë në përplasje të forta me grupin Bajrat, si dhe Arlind Bushati. Çifti Flutura dhe Bashkim Basha, të cilët po udhëtonin me motor, u përplasën nga makina e viktimave. Gruaja ndërroi jetë në vendngjarje, ndërsa bashkëshorti i saj vdiq më vonë në spital. Njoftimi Agjencia e Mbikëqyrjes Policore (Rajoni Shkodër-Lezhë) ka ekzekutuar Urdhërat e ndalimit caktuar nga Prokuroria pranë Gjykatës së Shkallës së Parë të Juridiksionit të Përgjithshëm Shkodër ndaj 4 punonjësve të policisë, të dyshuar për veprën penale “Shpërdorim detyre “ pasi nuk kanë rrespektuar procedurat standarde të “Sigurimit të vendit të ngjarjes” dhe shoqërimit për identifikim të personave të gjetur në vendin e ngjarjes. Inspektor B. K., dhe V.L., përkatësisht 45 dhe 33 vjeç, me detyrë Patrullë e Përgjithshme e Forcës së Posaçme Shqiponja në DVP Shkodër. Inspektor J. S., dhe M.M., përkatësisht 31 dhe 33 vjeç me detyrë Trupë Shërbimi në Forcën e Posaçme Shqiponja në DVP Shkodër. Urdhëri i ndalimit vjen pas referimit të bërë nga Drejtoria Rajonale e AMP – së, në lidhje me ngjarjen kriminale të datës 30 tetor, në lagjen Dobraç të Shkodrës, ku persona të paidentifikuar kanë qëlluar me armë zjarri ndaj automjetit tip Benz S-Class, në të cilin udhëtonin shtetasit H. L., dhe A. B., si dhe një person tjeter i paidentifikuar. AMP mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të abuzimit apo shkeljes së ligjit nga ana e punonjësve të strukturave mbikëqyrëse, duke telefonuar në numrin e gjelbër 0800 9090.
