Një e re tentoi vetëvrasjen duke u hedhur nga kati i dytë i shtëpisë ku jetonte, për shkak të dhunës që ushtronte ndaj saj bashkëjetuesi 24-vjeçar, i cili ka përfunduar prapa hekurave.
Njoftimi i Policisë:
Ushtroi dhunë ndaj bashkëjetueses së tij, e cila si pasojë e dhunës tentoi të vetëvritej duke u hedhur nga kati i dytë i banesës, arrestohet 24-vjeçari.
Specialistët për Hetimin e Krimeve të Komisariatit të Policisë Nr. 4, pas marrjes së njoftimit se mbrëmjen e djeshme rreth orës 23:30, një shtetase ishte vetëhedhur nga kati i dytë i banesës, menjëherë kanë organizuar punën për sqarimin e rrethanave të ngjarjes dhe dokumentimin e plotë ligjor të saj.
Në vijim të veprimeve hetimore të kryera, specialistët për Hetimin e Krimeve në Komisariatin e Policisë Nr. 4 arrestuan shtetasin E. H., 24 vjeç, banues në Tiranë, për veprat penale "Dhuna në familje" dhe "Shkaktimi i vetëvrasjes" mbetur në tentativë, parashikuar nga nenet 130/a dhe 99 e 22 të Kodit Penal.
24-vjeçari dyshohet se mbrëmjen e djeshme, rreth orës 23:30 ka ushtruar dhunë ndaj bashkëjetueses së tij, e cila si pasojë e dhunës është vetëhedhur nga kati i dytë i banesës. Aktualisht ndodhet në kujdesin e mjekëve, jashtë rrezikut për jetën.
Materialet i kaluan Prokurorisë.
