Zbardhen detaje nga atentati mafioz në Vlorë me dy të plagosur ku shënjestër ishte Kevin Hajrulla, kushëriri i njërit prej bosëve të krimit në Vlorë, Inez Hajrulla. 30-vjeçari kishte parkuar makinën e tij tip Benz, në lagjen “24 majit’ në vendin ku shkarkoheshin mallrat e dyqani në zonë dhe ishte ulur në një lokal që ndodhej vetëm pak metra më larg. Një moment, mbërrin një furgon që kishte sjellë fruta-perime dhe Hajrullën e kanë thirrur të lëvizte makinën dhe në momentin që ai ka hipur në automjet, atentatorët janë afruar me të shpejtë dhe kanë qëlluar në drejtim të tij. Pasojë Hajrulla ka mbetur i plagosur rëndë. Ai ka marrë disa plumba në bark. Ndërsa i plagosur ka mbetur dhe A. S., 35 vjeç, i cili ndodhej në afërsi të automjetit të Hajrullës në momentin e sulmit me kallashnikov. Nga kamerat e sigurisë rezulton se atentatorët e kanë vëzhguar Hajrullën për më shumë se gjysmë ore dhe sapo kanë parë që ka dalë nga lokali janë afruar me shpejtësi dhe kanë qëlluar me breshëri. Pas krimit, në afërsi të fshatit Panaja, ata kanë djegur automjetin tip KIA dhe janë larguar pa lënë gjurmë. Hetuesit thonë se shënjestër ishte Hajrulla, ndërsa 35-vjecari tjetër është plagosur krejt rastësisht. Dyshimet lidhen me përplasjet mes grupeve kriminale në Vlorë, pasi Hajrulla është kushëri i Inez Hajrullas, që mori drejtimin e grupit kriminal pas ekzekutimit në 2018 të Edison Arizajt, i njohur si Edison Faqedjeguri. I plagosuri Kevin Hajrulla nuk rezulton të ketë precedentë penalë, ndërsa kishte punuar në një call center.
