SPAK ka firmosur një tjetër masë arresti për Suel Çelën, një nga emrat më të njohur të botës së krimit në Shqipëri. Me urdhër të Prokurorisë së Posaçme, forcat e policisë kanë ushtruar kontrolle në bazat dhe bizneset e Suel Çelës. Megjithatë, arrestimi i tij nuk është bërë i mundur.
Suel Çela është shpallur në kërkim më herët, pas dëshmisë së të penduarit të drejtësisë, Nuredin Dumani. Ky i fundit ka deklaruar se Çela e kishte paguar për të vrarë Elton Kilën, i njohur ndryshe si Oti. Po ashtu, Dumani dëshmoi se Çela e kishte porositur edhe për vrasjen e administratorit të një shkolle private në Tiranë, Lulëzim Masha. Nga hetimet ka rezultuar se atentati ndaj Elton Kilës nuk u realizua, ndërsa Masha arriti të mbijetonte.
Suel Çela është hetuar gjithashtu për incidentin e njohur me punonjësit e policisë në derën e ish-tregut agroushqimor.
Në kuadër të këtij aksioni, janë arrestuar dy ish-gjyqtarë, Pajtime Fetahu dhe Zihni Shahu. Një masë e re sigurie është firmosur edhe për avokaten e Suel Çelës. Gjykata e Posaçme ka caktuar gjithashtu masën e detyrimit për paraqitje ndaj gazetarëve Artan Hoxha dhe Elton Qyno.
