Në Gjykatën e Posaçme Kundër Korrupsionit dhe Krimit të Organizuar (GJKKO) pritet të zhvillohet sot seanca paraprake për kreun e Partisë Demokratike, Sali Berisha, dhëndrin e tij Jamarbër Malltezi, dhe tre të akuzuar të tjerë në çështjen e kompleksit “Partizani”. Gjyqtarja Flojera Davidhi do të vendosë nëse dosja do të kalojë për gjykim ose jo.
Në seancën e datës 24 tetor, gjyqtarja Davidhi kishte pranuar kërkesën e mbrojtjes për të shtyrë shqyrtimin, duke u dhënë kohë për t’u njohur me aktet e dosjes. Nuk është ende e qartë nëse Sali Berisha do të jetë i pranishëm në këtë seancë.
Berisha akuzohet për korrupsion pasiv, pasi dyshohet se ka ndërmarrë veprime për miratimin e ligjeve dhe akteve nënligjore që favorizonin pesë familje pronare në kompleksin sportiv “Partizani”, nga të cilat përfitues ishte edhe dhëndri i tij, Jamarbër Malltezi. Malltezi akuzohet gjithashtu për korrupsion pasiv, i kryer në bashkëpunim.
