Një 32-vjeçar është plagosur me thikë mbrëmjen e sotme në lagjen nr. 4 të Durrësit, pas një konflikti për motive të dobëta.
Sipas informacioneve nga policia, dyshohet se autorët e ngjarjes janë dy vëllezër, të moshës 33 dhe 36 vjeç, të cilët janë shoqëruar në komisariat për t’u marrë në pyetje.
I plagosuri është transportuar menjëherë në spitalin e Durrësit, ku po merr trajtim mjekësor dhe ndodhet jashtë rrezikut për jetën.
Ndërkohë, grupi hetimor, nën drejtimin e Prokurorisë, po vijon punën për të zbardhur rrethanat dhe motivet e ngjarjes.
Njoftimi i Policisë:
Plagosën me mjet prerës (thikë) një 32-vjeçar, dyshohet pas një konflikti të çastit, ndërhyrja e menjëherëshme e shërbimeve të Policisë, bëri të mundur kapjen dhe shoqërimin e autorëve të dyshuar.
Rreth orës 18:45, në lagjen nr. 4 Durrës, dyshohet se pas një konflikti të çastit, dyshohet për motive të dobëta, shtetasit E.G, 36 vjeç dhe I. G. 33 vjeç, (vëllezër) kanë plagosur me mjet prerës (thikë), shtetasin G. B., 32 vjeç.
Ndërhyrja e menjëherëshme e shërbimeve të Policisë, bëri të mundur kapjen dhe shoqërimin në Komisariat, të dy vëllezërve për veprime të mëtejshme procedurale.
32-vjeçari është transportuar në spitalin e Durrësit, ku po merr ndihmë mjekësore dhe ndodhet jashtë rrezikut për jetën.
Grupi hetimor nën drejtimin e Prokurorisë po punon për sqarimin e plotë të rrethanave të rastit.
