Kreu i SPAK, Altin Dumani, ka theksuar rëndësinë e bashkëpunimit të institucionit që ai drejton me shoqërinë civile, duke nënvizuar rolin e saj në sigurimin e informacionit dhe analizave tematike që ndihmojnë në luftën kundër korrupsionit. Ai ka ftuar sërish shoqërinë civile të bashkëpunojë me SPAK dhe të kërkojë informacion nga ky institucion për çështje me interes publik.
Dumani deklaroi se SPAK ka aplikuar me sukses ligjin antimafia, duke sekuestruar pasuri të individëve të shkarkuar nga procesi i vetingut. Megjithatë, ai vuri në dukje se kompetencat e SPAK në raport me subjektet e vetingut janë të kufizuara, duke përfshirë vetëm një numër të vogël funksionarësh, si gjyqtarët e Gjykatës së Lartë dhe Kushtetuese, prokurorin e përgjithshëm dhe zyrtarë të tjerë të lartë.
“Nëse nga të dhënat e procesit të vetingut lindin dyshime për korrupsion, ne kemi regjistruar procedime penale,” sqaroi Dumani, duke theksuar se SPAK ka nisur hetime ndaj një sërë funksionarësh të nivelit të lartë, përfshirë gjyqtarë kushtetues, të Gjykatës së Lartë, anëtarë të KPA-së, prokurorë dhe oficerë të policisë gjyqësore.
Shqetësimi kryesor: funksionarët në sistem
Një tjetër problematikë e theksuar nga kreu i SPAK ishte fakti se shqetësimi më i madh nuk janë individët e shkarkuar nga vetingu, por ata që kanë kaluar këtë proces dhe vazhdojnë të ushtrojnë funksionet e tyre. Sipas Dumanit, këta individë përbëjnë rrezik për kryerjen e veprimeve korruptive në të ardhmen.
“Problemi është që ata janë ende në sistem dhe kanë premisa për të kryer veprime korruptive,” tha ai.
Dumani u bëri thirrje qytetarëve të denoncojnë çdo akt korruptiv të gjyqtarëve dhe prokurorëve, duke theksuar se institucioni që ai drejton është i gatshëm të veprojë mbi çdo informacion të besueshëm. Gjithashtu, ai i kërkoi institucioneve përgjegjëse në luftën kundër korrupsionit të jenë aktive dhe të furnizojnë SPAK-un me informacione të vlefshme.
“Çdo institucion të përmbushë detyrimet e veta,” përfundoi Dumani.
