Gjithnjë e më shumë njerëz po kalojnë nga kremrat “kimikë” të diellit tek ata “mineralë”, nga frika për toksicitet, ndotje dhe efektivitet. Por a ka vërtet ndonjë ndryshim?
Ekspertët shpjegojnë se termat krijojnë konfuzion: të gjithë filtrat e diellit janë “kimikë”. Filtrat e quajtur “kimikë” janë organikë (me lidhje karbon-hidrogjen), ndërsa ata “mineralë” (si oksidi i zinkut dhe dioksidi i titanit) janë inorganikë, por të dy llojet janë kimikë dhe mbrojnë ndaj rrezeve UV.
Shumë besojnë gabimisht se kremrat mineralë thjesht “reflektojnë” rrezet, ndërsa kremrat kimikë i thithin ato. Në realitet, kremrat mineralë thithin 95% të rrezeve UV dhe shpërndajnë vetëm 5% të tyre, ashtu si kremrat organikë.
Sa i përket sigurisë, studimet tregojnë se disa përbërës të kremrave kimikë mund të përthithen në gjak, por nuk ka prova se shkaktojnë dëm tek njerëzit. Studimet që kanë ngritur shqetësime janë bërë te kafshët, me sasi shumë më të mëdha se ato që përdorin njerëzit. Për të arritur të njëjtin nivel në trup, një person do të duhej të përdorte krem me oxybenzone çdo ditë për 277 vite.
Ekspertët thonë se të dy llojet e kremrave janë efektivë dhe të sigurt, dhe më e rëndësishmja është të përdoret rregullisht krem mbrojtës ndaj diellit, pavarësisht nëse është “kimik” apo “mineral”.
