159 qytetarë, mes tyre edhe të paraburgosur apo të dënuar, iu drejtuan Gjykatës së Tiranës me kërkesë për leje për të votuar. Ndër ta ishte edhe Florenc Çapja, i sapoekstraduar nga Dubai.
Kërkesa e Çapjas u rrëzua, pasi ai përjashtohet nga e drejta për të votuar, sipas ligjit të dekriminalizimit, i cili ndalon votimin për personat e dënuar për krime të rënda.
Florenc Çapja është dënuar me burgim të përjetshëm për vrasje të dyfishtë dhe pjesëmarrje në organizatë kriminale.
"Pranë Gjykatës së Shkallës së Parë të Juridiksionit të Përgjithshëm Tiranë janë paraqitur 159 kërkesa me objekt 'lejim votimi', nga të cilat 137 janë pranuar.
Të gatshëm për të shqyrtuar këto kërkesa kanë qenë të gjithë gjyqtarët e Dhomës Civile të kësaj gjykate, përveç atyre me raport mjekësor ose leje të miratuar më parë nga Kryetari", informoi gjykata për VNA.
