Katër persona janë arrestuar nga Policia në Tiranë dhe Elbasan, pasi u kapën në flagrancë duke fotografuar fletët e votimit gjatë procesit zgjedhor të 11 majit. Të arrestuarit janë proceduar penalisht për veprën “Shkelja e fshehtësisë së votimit”, e parashikuar nga neni 327/1 i Kodit Penal.
Në Tiranë, Policia njoftoi arrestimin në flagrancë të dy shtetasve, H. D., 57 vjeç dhe R. L., 28 vjeç, të cilët ishin shoqëruar fillimisht nga shërbimet e Komisariateve Nr. 3 dhe Nr. 4, pas sinjalizimeve nga kryetarët e komisioneve të qendrave ku ata kishin votuar.
Po në Tiranë, në një rast tjetër, shtetasja A. H. u arrestua pas kallëzimit të kryetarit të Komisionit Zonal, i cili e konstatoi duke fotografuar fletën e votimit brenda qendrës. Pas mbërritjes së Policisë dhe veprimeve hetimore, u bë arrestimi i saj dhe sekuestrimi i provave përkatëse.
Ndërkohë, në Elbasan, në qendrën e votimit nr. 2321 në lagjen “5 Maj”, një 56-vjeçare me iniciale M. C. u kap në flagrancë duke fotografuar votën. Ajo u sinjalizua nga një anëtar i komisionit dhe u shoqërua në komisariat, ku Prokuroria urdhëroi arrestimin e saj dhe sekuestrimin e telefonit si provë materiale.
Autoritetet sqaruan se në të gjitha rastet, procesi i votimit në qendrat përkatëse vijoi normalisht. Policia dhe organet e drejtësisë kanë bërë apel për respektimin e ligjit dhe ruajtjen e fshehtësisë së votës si një element thelbësor i integritetit të zgjedhjeve.
