Një incident i dyshuar për blerje votash është raportuar mbrëmjen e sotme në fshatin Pilafë, Njësia Administrative Tomin, në qarkun e Dibrës. Rreth orës 20:25, kandidati për deputet nga radhët e Partisë Demokratike, Xh.Gj., ka telefonuar sallën operative të Drejtorisë Vendore të Policisë Dibër, duke denoncuar se një shtetas ishte ndaluar pasi dyshohej se po shpërndante para në këmbim të votave.
Sipas të njëjtit denoncim, një person tjetër, gjatë largimit nga vendngjarja, dyshohet se ka qëlluar njëherë me armë zjarri në ajër.
Menjëherë pas sinjalizimit, është ngritur grupi hetimor i DVP Dibër. Hetimet po kryhen në bashkëpunim me Prokurorinë e Posaçme Kundër Korrupsionit dhe Krimit të Organizuar (SPAK) dhe Prokurorinë pranë Juridiksionit të Përgjithshëm Dibër, me qëllim zbardhjen e plotë të rrethanave të rastit.
Deri më tani nuk raportohet për persona të ndaluar, ndërsa Policia vijon hetimet për të verifikuar të gjitha pretendimet.
