Erlind Pëllumbi u rizgjodh pak kohë më parë president i Federatës Shqiptare të Volejbollit. Në dukje, një proces normal, por në realitet, krejt ndryshe. Një nen në statutin e federatës nuk lejon më shumë se dy mandate për presidentin. Pëllumbi i kishte përfunduar tashmë dy mandate, por shfrytëzoi faktin që, gjatë tetë viteve, nuk ishte njohur zyrtarisht nga gjykata, pasi në regjistrat gjyqësorë figuron ende një asamble e mbajtur 13 vite më parë. Duke shfrytëzuar këtë boshllëk, ai kandidoi sërish dhe u zgjodh, ashtu siç pritej.
Por, përtej aspektit etik, ka edhe disa çështje serioze ligjore.
Së pari, gjatë mandatit të dytë, kur ende nuk ishte i njohur nga gjykata, Pëllumbi mori pjesë në asamblenë e KOKSH dhe votoi në zgjedhjet e Fidel Yllit. A e bën kjo votën e tij të pavlefshme dhe a kompromenton gjithë procesin? Nëse ka pasur shkelje në volejboll, a ka pasur edhe në KOKSH?
Së dyti, Federata Shqiptare e Volejbollit merr fonde publike për organizimin e aktiviteteve, që kalojnë 100 milionë lekë në vit. Nëse presidenti nuk ka qenë i njohur nga gjykata, kush ka firmosur për këto fonde?
Në një kohë kur për shuma të tilla parash po hetohen shumë individë nga SPAK, mbetet për t’u parë nëse kjo çështje do të tërheqë vëmendjen e drejtësisë.
