Grupi Parlamentar i Partisë Socialiste u mblodh sot në Kryesinë e Kuvendit, ku zhvilloi një dëgjesë me rektorin e Universitetit Bujqësor të Tiranës, Fatbardh Sallaku, pas masave të ndërmarra nga SPAK ndaj stafit akademik. Në këtë mbledhje ishte i pranishëm edhe kryeministri Edi Rama.
Rektori Sallaku theksoi se institucioni nuk do të komentojë vendimet e drejtësisë, por shprehu besimin për një proces të ndershëm. Ai tha se stafi akademik ka nisur betejën ligjore për të provuar se ka zbatuar ligjin.
“Ne nuk mbrojmë askënd që mund të ketë abuzuar, ia lëmë drejtësisë të veprojë. Shpresojmë që procesi të jetë sa më transparent dhe i drejtë. Shumica e pedagogëve janë njerëz të ndershëm dhe tashmë kanë nisur të mbrojnë veten me fakte. Besojmë që do të ketë një proces të ndershëm. Në Universitet është i rëndësishëm imazhi dhe krijimi i besimit." u shpreh Sallaku
Ai theksoi se Universiteti Bujqësor ndodhet në një moment historik, duke synuar njehsimin e plotë të diplomave me Universitetin BOKU të Vjenës.
