Pas shumë halleve që u kanë rënë në kokë me dosjet e fundit, deputetëve të PS-së do t’u duhet nesër të dëgjojnë edhe ankesat e rektorit të Universitetit Bujqësor. Fatbardh Sallaku do t’i ankohet nesër grupit parlamentar të PS-së, lidhur me 24 masa sigurie për stafin dhe pedagogët e universitetit për disa procedura të disa viteve më parë. Bëhet fjalë për disa tendera me shifra që shkojnë te 300 mijë euro. Përtej këtij akti ekstraligjor që nuk ka asnjë kuptim juridik apo politik, Edi Rama u shton edhe një hall deputetëve të tij. Mirë Veliaj dhe disa ish-ministra, mirë halli i zgjedhjeve dhe fushatës, por ç’taksirat kanë deputetët e PS-së të dëgjojnë edhe hallin e ca të dyshuarve për korrupsion në Universitetin Bujqësor? A thua nuk u mjaftoi “autokritika” e Klotilda Bushkës dhe tensioni se në çdo moment mund të shfaqen në ndonjë dosje hetimore.
Por, mesa duket, ka menduar Edi Rama për këtë, duke ua rritur tensionin, prishur humorin dhe rrëmbyer kohën për të dëgjuar ca hallexhinj që ndoshta s’kanë asnjë lidhje me PS-në, përveç faktit se e kanë pak “dorën e gjatë” kur bëhet fjalë për tendera.
