Presidenti i Serbisë, Aleksandar Vuçiç, ka rikthyer në vëmendje çështjen e ndryshimit të rrjedhës së lumit Ibër, duke deklaruar se ekziston dokumentacion paraprak për projektin dhe se javën e ardhshme pritet të ngrihet një grup ekspertësh që do të merret me këtë çështje.
Gjatë vizitave në zona të ndryshme të Serbisë, Vuçiç iu përgjigj edhe reagimeve të ardhura nga Kosova, Shqipëria dhe vende të tjera europiane. Sipas tij, nisma për ndërhyrjen në rrjedhën e lumit lidhet me një kërkesë të komunës së Novi Pazarit dhe disa organizatave lokale, në kuadër të një projekti për ndërtimin e një hidrocentrali të vogël.
“Ata ndoshta nisen nga vetja dhe mendojnë se dikush po bën diçka kundër dikujt. Nuk kam asnjë koment për hipokrizinë e europianëve dhe të gjithë të tjerëve. Shpina e Nenad Rashkoviqit është fytyra e Albin Kurtit. Ai nuk ka qenë kurrë i interesuar për dialog”, deklaroi Vuçiç.
Presidenti serb iu referua rastit të Nenad Rashkoviqit, një serb nga Kosova, i cili pretendon se është dhunuar nga pjesëtarë të Policisë së Kosovës në fshatin Dren të Zubin Potokut. Autoritetet kosovare kanë nisur hetimet për ngjarjen dhe ende nuk kanë publikuar përfundime, ndërsa rasti është shoqëruar me reagime të forta politike nga Lista Serbe dhe vetë Vuçiç.
“Nuk pashë asgjë qesharake në këtë. Gati sa nuk qava në një moment kur e takova, por kur pashë sa i fortë ishte ky njeri, atëherë u turpërova, kështu që disi e përmbajta veten dhe vazhdova bisedën me të”, u shpreh presidenti serb.
Vuçiç pretendoi gjithashtu se Rashkoviq kishte pësuar disa fraktura në brinjë dhe dëmtime të tjera në trup.
Paralelisht me përplasjet me Prishtinën, presidenti serb vijon retorikën e ashpër edhe ndaj Malit të Zi. Qeveria në Podgoricë i është kundërpërgjigjur akuzave të tij për “tradhti” lidhur me njohjen e pavarësisë së Kosovës.
Sipas deklarimeve të përfaqësuesve të partisë në pushtet në Podgoricë, Vuçiç po përpiqet të zhvendosë krizën e brendshme politike të Serbisë drejt vendeve të tjera të rajonit, duke krijuar tensione artificiale përmes deklaratave dhe provokimeve.
