Tensione të forta shpërthyen këtë të mërkurë në Kuvendin e Kosovës, ku aktiviteti i përvitshëm me mërgatën u kthye në një përplasje të ashpër mes deputetëve të Partisë Demokratike të Kosovës dhe përfaqësuesve të Lëvizjes Vetëvendosje.
Gjithçka nisi kur Donika Gërvalla hyri në sallën e seancave plenare për të marrë pjesë në takimin me bashkatdhetarët. Deputetet e PDK-së, Blerta Deliu, Eliza Hoxha dhe Ganimete Musliu, iu drejtuan duke i kërkuar thirrjen e seancës konstituive të Kuvendit.
“Thirre seancën” dhe “boll me performanca, thirre seancën”, ishin thirrjet që iu drejtuan Gërvallës.
Ajo iu përgjigj duke i ftuar deputetët e opozitës në takim për të arritur një marrëveshje.
“Ejani në takim, pse s’po vini, pse po tuteni”, tha Gërvalla.
Debati u ashpërsua kur deputeti i PDK-së Artan Behrami e akuzoi Gërvallën se kishte çuar dosje në Gjykatën Speciale kundër UÇK-së.
“Mos rrej”, iu përgjigj Gërvalla.
Në përplasje u përfshi edhe Ganimete Musliu, e cila e akuzoi Gërvallën se ishte falënderuar publikisht nga Ivica Daçiç.
“Mos rrej publikisht”, iu përgjigj Gërvalla.
Musliu më pas iu drejtua përfaqësuesve të Vetëvendosjes me akuzën: “Jeni super kriminelë, e keni shkelur Kushtetutën”.
Situata u tensionua edhe më tej kur përplasja u zhvendos te deputeti i Vetëvendosjes Ardian Gola. Në një moment, Ganimete Musliu mori një gotë me ujë dhe ia hodhi Golës.
Pamjet e publikuara nga mediat kosovare konfirmojnë se uji iu hodh Ardian Golës dhe jo Donika Gërvallës, siç u raportua fillimisht nga disa media.
Edhe ndaj Golës deputetët e PDK-së vazhduan me të njëjtën kërkesë: “Thirre seancën”.
Përplasjet nuk përfunduan me kaq. Tensione pati edhe me Arbërie Nagavcin, ndërsa deputetja e PDK-së Albana Bytyqi tentoi ta pengonte hyrjen e saj në sallë dhe më pas hodhi letra në drejtim të saj.
Në qendër të konfliktit është ngërçi për konstituimin e Kuvendit të Kosovës, për të cilin opozita akuzon Vetëvendosjen se po zvarrit procesin dhe po shkel Kushtetutën.
Për shkak të tensioneve, aktiviteti i Kuvendit me mërgatën u ndërpre, ndërsa takimi që duhej t’u kushtohej bashkatdhetarëve përfundoi në një përplasje të fortë politike mes mazhorancës dhe opozitës.
