Video e mjekut të Onkologjikut Edmond Gashi, që largohet me vrap pasi njihet me masën e sigurisë në Gjykatën e Tiranës, bëri xhiron e rrjetin.
Në lidhje me largimin e tij nga ambjentet e gjykatës, duke përdorur një nga hyrjet që lejohet vetëm për gjyqtarët ka sjellë edhe reagim zyrtar nga ana e institiconit të drejtësisë.
“Me përfundimin e seancës gjyqësore, pasi gjyqtarja ka lënë sallën e gjyqit, po kështu me rradhë pas saj edhe prokurori, avokatët, si dhe vetë personat nën hetim, shtetasi Edmond Gashi teksa ka qënë në korridorin e katit të parë të gjykatës, duke përfituar nga një moment i vetëm në të cilin një punonjëse e gjykatës ka qënë duke dalë në rrethana krejtësisht rastësore nga dera e cila shërben për hyrjet dhe daljet e autorizuara vetëm të gjyqtarëve dhe punonjësve të gjykatës (me karta të posaçme), ka dalë i shoqëruar edhe nga një shtetas tjetër, duke u larguar me vrap, i pa shoqëruar nga asnjë punonjës i policisë së shtetit”, theksohet në njoftim.
Edmond Gashi, është një nga tetë mjekët dhe zyrtarët e shëndetësisë të përfshirë në skandalin e Onkologjikut, ku pacientëve me tumor nuk ju jepej shërbim në spitalin shtetëror, por orientoheshin në klinikat private.
