Në spitalin “Nënë Tereza” ka qenë i vendosur dhe burimi i kobaltit që shërbente për radioterapinë por nuk vendosej në punë dhe ishte jashtë kushteve të përdorshmërisë duke u kthyer në një burim rrezik për pacientët.
Gjatë hetimit është bërë e mundur që ky burim të zhvendosej dhe të vendosej në dhomën adapte”, thuhej ndër të tjera në njoftimin e Policisë së Tiranës, teksa u bënë publike detajet e një hetimi gati 1-vjecar që dërgoi në arrest shtëpie dhe detyrim paraqitje mjekë dhe specialist të Onkologjikut, përfshirë dhe ish-zv.drejtoreshën e QSUT, Brikena Qirjazi e cila së fundmi ishte candidate për dekane e Fakultetit të Mjekësisë.
Prokuroria sqaroi përmes një njoftimi të mëvonshëm se në “vijim të veprimeve hetimore rezultoi se në Spitalin Onkologjik në QSUNT u instalua një Aparaturë Kobalto-Terapie për trajtimin e të sëmurëve të diagnostikuar me sëmundje tomorale dhe sidomos të sëmundjeve të kancerit të lëkurës.
Që të përdoret Kobalto Therapy duhet të krijohet një bunker antiradioaktiv ose antiatomik në kushtet e miratuara dhe të prezantuara nga Agjensia Atomike e Vienës ose Agjencia Ndërkombëtare që thirret IEAHEA. Hetimet zbuluan se ky bunker jo vetëm nuk u krijua por aparatura u vendos jashtë kushtetve teknike.
Që nga viti 2021 kur ky aparat ka mbërritur në Shqiperi dhe deri më sot, ai jo vetëm që nuk është shfrytëzuar por është lënë në kushte të papërshtatshme duke u bërë burim rreziku ndaj vete personelit mjekesor si pasojë e rrezatimeve të mundshme që emëton kjo pajisje”.
Ndërkohë që të gjithë ishin të dijeni të këtij skandali dhe rrezatimi që emetonte pajisja rrezikonte jetën e personelit mjekësor dhe të pacientëve, vetëm një mjek vendosi të reagojë.
A.H ngriti shqetësimin për dëmet në shëndetin e personelit dhe pacientëve. Në kushtet kur nga drejtuesit e Shërbimit Onkologjik nuk u mor asnjë masë. Gjendur përpara një situate të tillë mjeku vendosi të jepte dorëheqjen.
“Dr.A.H pasi parashtroi këtë shqetësim dhe nga drejtuesit e Shërbimit Onkologjik nuk u mor asnjë masë, ai dha dorëheqjen duke u larguar nga puna, për arsye të shqetësimit të tij të ngritur në mënyrë të përsëritur lidhur me dëme të mundshme të shëndetit si pasjojë e ketyre pajisjeve dhe burimeve me potencialin për të rrezikuar jetën e stafit dhe pacientëve në rast të një incidenti”, thuhet në dosje.
