Shpërndarësit e lëndëve narkotike po përdorin gjithnjë e më shumë metoda të reja për të tërhequr të rinjtë dhe adoleshentët drejt konsumit të drogës. Një prej formave më të fundit të evidentuara nga autoritetet është shpërndarja e kanabisit sintetik në formë karamelesh ose xhelatine, një produkt që për shkak të pamjes së tij mund të mos ngjallë dyshime te konsumatorët.
Sipas të dhënave të Policisë së Shtetit, gjatë pesë muajve të parë të vitit janë sekuestruar rreth 700 gramë të kësaj lënde narkotike, e cila po fiton terren kryesisht përmes shitjeve online.
Hetimet kanë çuar gjithashtu në identifikimin e një ambienti në Durrës, ku droga përpunohej dhe përgatitej në formën e karameleve prej xhelatine për t’u hedhur më pas në treg.
Autoritetet shprehen të shqetësuara pasi kjo lëndë, për shkak të paraqitjes së saj të pazakontë, mund të konsumohet nga adoleshentët pa qenë të vetëdijshëm për përmbajtjen dhe rreziqet që mbart për shëndetin.
Për këtë arsye, Policia e Shtetit ka njoftuar edhe Ministrinë e Arsimit, duke kërkuar rritjen e vigjilencës për përhapjen e kësaj droge mes nxënësve dhe të rinjve.
Ndërkohë, gjatë periudhës janar - 15 qershor, në kuadër të operacioneve kundër narkotikëve janë sekuestruar edhe sasi të konsiderueshme të drogave të tjera, përfshirë rreth 9 kilogramë kokainë, 3 kilogramë heroinë dhe afro 800 kilogramë kanabis.
