Gjykata e Posaçme e cilësoi fajtor dhe dënoi me 4 vite burgim avokatin Radovan Çela, i akuzuar për korrupsion dhe ushtrim ndikimi të paligjshëm, lidhur me dosjen Toyota Auris. Për shkak të gjykimit të shkurtuar, dënimi i reduktohet në 2 vite e 8 muaj. Avokati që mbronte në proces të pandehurit për dosjen e bujshme Toyota Auris, që trafikuan 3.4 milionë euro të cilat u bllokuan në Portin e Durrësit, akuzohet se ka dhënë ryshfet te njerëzit e drejtësisë që të favorizoheshin të pandehurit, përkatësisht vëllai dhe kushëriri i biznesmenit Astrit Vladi. Ai u zbulua nga zbërthimi i komunikimeve në Sky ECC. Më herët, GJKKO dënoi ish-kryeprokurorin e Vlorës, Aurel Zarka, ndërsa veçmas do të gjykohen ish-oficerja gjyqësore Erjona Daupaj dhe biznesmeni Vladi. Të dy këta janë në kërkim.
