Kompania “Star Parking Albania” që ofron shërbimin e parkimit tek aeroporti “Nënë Tereza”, është gjobitur nga Autoriteti i Konkurrencës me rreth 7.5 milionë lekë të vjetra, për shkak se mban tarifa të larta dhe të pajustifikueshme për konsumatorët.
Sipas vendimit të Komisionit të Konkurrencës pranë Autoritetit të Konkurrencës, subjekti në fjalë ka vepruar në kushtet e monopolit dhe ka abuzuar me pozitën dominuese. Gjithashtu në vendim thuhet që kompania në fjalë do të mbahet nën vëzhgim edhe për një vit tjetër.
Autoriteti i Konkurrencës gjithashtu është shprehur edhe për shërbimin Taxi në Aeroportin “Nënë Tereza”, të cilin e pati nën vëzhgim pas problematikave që ka hasur një vit më parë ku koncensionari i aeroportit ka lejuar shërbimin e taksive vetëm për një operator. Në vendim thuhet se rekomandimet janë marrë parasysh nga koncensionari duke shtuar konkurrencën.
Por një problem tjetër që ka vënë re ky Komision janë mospërputhja e tarifave për shërbimin taxi. Kjo pasi kompania “Auto Holiday Albania” edhe pse është licensuar nga bashkia Krujë, përdor tarifat e Bashkisë Tiranë. Për këtë Autoriteti i Konkurrencës do t’i rekomandojë Ministrisë së Infrastrukturës dhe Energjisë të rishoh ligjin për këtë kategori.
