SPAK ka dokumentuar përmes përgjimeve dhe komunikimeve të siguruara bashkëpunimin mes gazetarit Artan Hoxha dhe Suel Çelës, i njohur ndryshe si Marjus Lulaj, kreu i një organizate kriminale ndërkombëtare. Në dosjen e hetimeve përfshihen detaje që tregojnë se Hoxha ka marrë udhëzime të drejtpërdrejta nga Çela për të ndikuar në mënyrën se si raportohej në media dhe për të sulmuar rivalët e këtij të fundit.
Përdorimi i SkyECC dhe shkëmbimi i informacioneve
Sipas dosjes, Artan Hoxha përdorte aplikacionin e komunikimit të koduar SkyECC, një shërbim të cilin Suel Çela ia siguronte si pjesë e organizatës së tij kriminale. Përmes këtij aplikacioni, Çela i përcillte gazetarit udhëzime specifike për përgatitjen e emisioneve televizive, duke përfshirë mënyrën e trajtimit të temave dhe personave që do të ishin në qendër të sulmeve mediatike.
Një nga episodet kyçe ishte përgatitja e emisionit “Opinion” më 6 shkurt 2020, ku Çela e udhëzoi Hoxhën të publikonte një foto të kryeministrit Edi Rama me një anëtar të familjes Çapja, rivalë të Suel Çelës. Fotoja shkaktoi debate të ashpra publike, ndërsa Hoxha u angazhua gjatë emisionit në sulme të ashpra ndaj Çapjave dhe kryeministrit, duke ndjekur udhëzimet e Çelës.
SPAK evidenton gjithashtu një plan të inskenuar kërcënimesh ndaj Artan Hoxhës, që synonte krijimin e një narrative të rreme në opinionin publik. Në shkurt 2020, Çela organizoi dërgimin e mesazheve kërcënuese nga jashtë vendit, të cilat u inskenuan sikur vinin nga grupi rival i Çapjave. Po ashtu, u realizuan fotografi që pretendonin se Hoxha ishte vëzhguar nga ky grup. Këto “kërcënime” u përdorën nga gazetari për të përforcuar narrativën e tij gjatë emisionit “Opinion” dhe për të dëmtuar rivalët e Çelës.
Dosja e SPAK zbulon se Artan Hoxha është shpërblyer financiarisht nga Suel Çela për bashkëpunimin e tij. Në disa raste, Çela ka dërguar shuma parash përmes ndërmjetësuesve, duke përfshirë edhe personin Skënder Sufaj. Një nga episodet përfshin një shpërblim prej 15 mijë eurosh të dhënë personalisht gazetarit.
