Biznesmeni kontrovers Klodian Allajbeu kallëzohet në SPAK, pasi ka dyshime të forta se përmes njerëzve të tij të besuar kontrollon dy nga koncesionet më të shtrenjta në shëndetësi, koncesionin e laboratorëve me vlerë 130 milionë euro dhe atë të Hemodializës me vlerë 84 mln euro.
Është avokatja Orgesa Serani, e cila I është drejtuar Prokurorisë së Posacme duke depozituar kallëzim penal ndaj Klodian Allajbeut duke kërkuar që ai të hetohet për akuzat e “falsifikimit të dokumentave”, “vjedhjes me anë të mashtrimit të pasurisë publike”, “korrupsionit aktiv të funksionarëve publikë”, “fshehjes së të ardhurave” dhe “pastrimit të parave”.
Avokatja kërkon edhe hetimin e një sërë kompanish, për të cilat ngre dyshime të forta se kontrollohen në mënyrë indirekte nga Klodian Allajbeu, përmes personave të besuar.
Konkretisht kërkohet hetimi i shoqërive “Western Balkans University”, “Evita” shpk dhe të administratores së kësaj shoqërie, Elona Saraci, të Majlinda Fetiut, e cila dyshohet si ortake fiktive e “Evita” shpk.
Në listën e kompanive që kërkohet hetim është edhe “Anamark” shpk (ish ndërmarrja e karburanteve), Blue Sea Mariculture, Con Energy Albania, Energy projekt, Future Cement, Medidal Recycling, Internacional Hospital (spitali Hygea), Dia Vita shpk, Balkan Alliance Healthcare BV, e krijuar në shtetin e Holandës, KA Healthvare limited, Diaverum International AB.
Në kallëzimin e depozituar në Spak renditen dhe emrat e zyrtarëve përgjegjes të mbikqyrjes së kontratave koncesionare.
Listën e kryeson Ogerta Manastirliu, ish-ministre e Shëndetësisë, e cila është kallëzuar për akuzat e shpërdorimit të detyrës dhe korrupsionit pasiv të funksionarëve të lartë shtetërore, si dhe Erion Manohasa, Alketa Hila, Anila Denaj, Adela Xhemali, Rudina Degjoni, Elsa Berziu, Albana Çela, ish-drejtues të Fondit të sigurimit të detyrueshëm Shëndetësor.
Rasim Hamzaraj, Jani Karathano, Sokol Ramizi, dyshohet se janë “maskat” e Allajbeut përmes të cilëve kontrollon koncesionet miliona euro.
Ka dyshime se paratë përmes një zinxhiri kompanish trasferohen në Holandë e prej andej në Britaninë e Madhe ku investohen në pasuri të paluajtshme. VNA do të sjellë në ditët në vijim detaje që dëshmojnë sesi Klodian Allajbeu, lidhet me këto dy koncesione.
