Një 70-vjeçar është vetëdorëzuar në Policinë e Shkodrës, disa orë pasi dyshohet se plagosi me armë zjarri fqinjin e tij, pas një konflikti në lagjen “Partizani”.
Sipas Policisë, Pjerin Bitani dyshohet se rreth orës 14:30 të kësaj të enjteje ka qëlluar me armë zjarri ndaj fqinjit të tij, Vladimir Bruçi, 64 vjeç. I plagosuri është transportuar në Spitalin Rajonal të Shkodrës dhe, sipas autoriteteve, ndodhet jashtë rrezikut për jetën.
Pas ngjarjes, autori i dyshuar ishte larguar dhe qëndronte i fshehur në lagjen “Rus”. Policia zhvilloi kontrolle të shumta për lokalizimin e tij, ndërsa paralelisht vijuan negociatat me familjarët.
Sipas njoftimit zyrtar, si rezultat i kontrolleve, pamundësisë për t’u larguar apo për të qëndruar i fshehur dhe negociatave të vazhdueshme mes familjarëve dhe Policisë, 70-vjeçari u vetëdorëzua pranë strukturave policore.
Në përfundim të veprimeve procedurale, Pjerin Bitani u arrestua për veprat penale “Vrasja me dashje”, mbetur në tentativë, dhe “Mbajtja pa leje dhe prodhimi i armëve, armëve shpërthyese dhe i municionit”.
Paraprakisht, Policia e cilëson ngjarjen të ndodhur për “motive të dobëta”. Sipas raportimeve, konflikti mes dy fqinjëve dyshohet se lidhej me një kamerë sigurie.
Materialet procedurale i janë referuar Prokurorisë së Shkodrës për veprime të mëtejshme hetimore.
