Një raporti i fundit i Departamentit Amerikan të Shtetit bën thirrje që në Shqipëri të zbatohet reforma në drejtësi e miratuar në vitin 2016.
Raport i Strategjisë Ndërkombëtare të Kontrollit të Narkotikëve thotë se SPAK-u në Shqipëri ndërmori veprime që përfshinin arrestimet dhe sekuestrimin e pasurive të ish-zyrtarëve të lartë.
Po ashtu në raport përmendet edhe rasti i ish kryeministrit Sali Berisha apo i ish ministrit Lefter Koka, i cili ndodhet ne burg.
“Në vitin 2023, SPAK ndërmori veprime që përfshinin arrestimet dhe sekuestrimin e pasurive të ish-zyrtarëve të lartë. Në tetor, SPAK njoftoi një hetim ndaj ish-kryeministrit Sali Berisha. SPAK arrestoi dhëndrin e Berishës për korrupsion dhe pastrim parash dhe sekuestroi pasuritë e tij. Në tetor gjykatat dënuan ish-ministrin e mjedisit Lefter Koka për pastrim parash, korrupsion dhe shpërdorimi i detyrës sepse një kompani pagoi 1.47 milionë dollarë në llogaritë dhe kompanitë e Kokës për punë të pa kryera kurrë. Gjykata sekuestroi edhe pasuri me vlerë 4 milionë dollarë”.
Po ashtu në raport theksohet se “Shqipëria duhet të shtojë hetimet dhe paditë për pastrim parash për të luftuar korrupsionin, krimin e organizuar dhe trafikun e drogës, të përmirësojë bashkëpunimin ndërinstitucional dhe të integrojë plotësisht SPAK-un në përpjekjet kundër pastrimit të parave”.
Pavarësisht hetimeve të shumta për pastrim parash, ndjekjet penale mbeten të ulëta- thuhet ne raport.
“Shqipëria duhet të zbatojë ligjet ekzistuese, të ndjekë udhëzimet rregullatore, të kryejë mbikëqyrje efektive, të përmirësojë bashkëpunimin në zbatimin e ligjit dhe të zgjerojë kapacitetin e policisë dhe prokurorëve për t’u fokusuar në korrupsionin, pastrimin e parave dhe krimet ekonomike”.
