Kreu i Partisë Demokratike, Sali Berisha, vijon të lëshojë deklarata kontradiktore për institucionet e drejtësisë dhe konkretisht SPAK.
Pasditen e sotme nga foltorja e Kuvendi, Berisha ka akuzuar deputetin e Partisë Socialiste, Fatmir Xhafaj, i cili gjithashtu është kryetar i Komisionit AntiKorrupsion, për përpjekjet për të dëmtuar SPAK dhe Reformën në Drejtësi. Ai ka theksuar se Xhafaj është duke punuar për të shkatërruar këto institucione dhe ka shprehur dyshime mbi procesin e reformës në drejtësi.
“Ku është ky Xhafa, se edhe ky… ku është? Ku e keni Xhafën, sepse po përpunon doktrinën e shkatërrimit të SPAK tani, të reformës.” - tha Berisha
Por paraditen e sotme pasi u paraqit në SPAK në zbatim të vendimit të GJKKO, Berisha para mbështetësve paralajmëroi shkrirjen e Prokurorisë së Posaçme. Lideri i opozitës tha se SPAK është jashtë kontrollit dhe sipas tij duhet të pushojë së ekzistuari.
“Të njëjtin fat me bandat do kenë prokurorët që janë të lidhur me bandat. Absolutisht ky institucion nuk do të ekzistojë. Unë ndjej keqardhje se rrëmbeheni nga momente, por një institucion që është jashtë çdo kontrolli, është një institucion për t’u shuar me çdo kusht” - tha Berisha.
