Presidenti rus Vladimir Putin ka hedhur poshtë pretendimet se Rusia qëndron pas organizimit dhe nxitjes së protestave masive në disa qytete evropiane, duke i cilësuar akuzat si të ekzagjeruara dhe të pabazuara. Në një intervistë për televizionin rus VGTRK, kreu i Kremlinit deklaroi se udhëheqësit evropianë po përpiqen t’ua atribuojnë faktorëve të jashtëm pakënaqësitë e qytetarëve, në vend që të analizojnë problemet e brendshme që kanë shkaktuar demonstratat.
Putin u shpreh i habitur nga reagimi i liderëve evropianë, të cilët, sipas tij, fillimisht fajësuan administratën amerikane për mbështetjen e lëvizjeve të djathta dhe më pas drejtuan akuzat ndaj Moskës.
“Të thuash se ne po provokojmë protesta masive në qytetet e mëdha evropiane është një ekzagjerim i qartë”, deklaroi presidenti rus.
Ai shtoi se një qasje e tillë tregon dobësinë e disa udhëheqësve evropianë, të cilët, sipas tij, preferojnë të fajësojnë Rusinë dhe Shtetet e Bashkuara në vend që të marrin përgjegjësi për pakënaqësitë sociale dhe politike.
Deklaratat e Putinit vijnë në një kohë kur Franca është përfshirë nga protesta studentore, të cilat kanë nxitur debate mbi ndikimin e mundshëm të aktorëve të huaj.
Ministri i Jashtëm francez, Jean-Noël Barrot, ka ngritur shqetësime lidhur me përdorimin e narrativave që ai i konsideron armiqësore dhe të lidhura me Rusinë, Kinën, Iranin dhe lëvizjen amerikane MAGA.
Ndërkohë, Kremlini vazhdon të mohojë çdo përfshirje në zhvillimet politike dhe protestat në vendet evropiane. Edhe zëdhënësi i presidencës ruse, Dmitry Peskov, i ka cilësuar më herët këto akuza si “absurde”.
