Nuk vjen nga partitë tradicionale dhe nuk e ka ndërtuar karrierën në korridoret e pushtetit. Ilija Srdanoviç është kardiolog dhe profesor në Fakultetin e Mjekësisë në Novi Sad, por në zgjedhjet parlamentare të 25 tetorit 2026 emri i tij lidhet me një rol krejt tjetër: drejtimin e Listës Studentore, lëvizjes politike të lindur nga protestat kundër korrupsionit në Serbi.
Për vite me radhë, Srdanoviç ka ushtruar profesionin e mjekut dhe pedagogut. Dalja e tij në skenën politike lidhet me protestat studentore, të cilat e kthyen pakënaqësinë ndaj korrupsionit dhe institucioneve në një mobilizim më të gjerë shoqëror.
Pasi mbështeti publikisht protestat, në shtator 2026 ai u shpall kryesues i Listës Studentore të pavarur, duke marrë përsipër përfaqësimin politik të një lëvizjeje që kërkon ndryshim të mënyrës së qeverisjes.
Por profili i tij politik nuk përputhet domosdoshmërisht me atë që mund të pritej nga një kandidat i dalë prej një lëvizjeje studentore pro ndryshimit.
Në programin që i atribuohet, një vend të rëndësishëm zë decentralizimi i sistemit shëndetësor, me synimin për të zhvendosur vendimmarrjen dhe burimet më pranë qytetarëve. Kjo është edhe fusha ku përvoja e tij profesionale lidhet drejtpërdrejt me propozimet politike.
Në politikën e jashtme, Srdanoviç paraqet një qasje më të rezervuar ndaj integrimit të menjëhershëm në Bashkimin Europian. Ai vendos në plan të parë atë që e quan mbijetesë kombëtare, një formulim që hap diskutimin mbi raportin mes sovranitetit, reformave të brendshme dhe orientimit europian të Serbisë.
I lindur në vitin 1970 në Novi Sad, Srdanoviç e kaloi fëmijërinë dhe vitet e shkollimit në Vrbas. U diplomua në Fakultetin e Mjekësisë në Novi Sad në vitin 1995, përfundoi specializimin në vitin 2001 dhe subspecializimin në vitin 2004. Në vitin 2012 mbrojti doktoraturën, ndërsa prej vitit 2018 jep mësim në universitet. Në vitin 2025 mori titullin profesor i rregullt. 
Ai punon gjithashtu si kardiolog në Institutin e Sëmundjeve Kardiovaskulare të Vojvodinës, në Sremska Kamenica, ku merret me pacientët me sindroma akute koronare. 
Një nga episodet që e bëri të njohur jashtë mjekësisë ishte mbështetja për studentët pas shembjes së strehës së stacionit hekurudhor të Novi Sadit, më 1 nëntor 2024, tragjedi që shkaktoi 16 viktima. Srdanoviç u përfshi publikisht në protestat që kërkonin përgjegjësi për ngjarjen dhe, sipas raportimeve të medias serbe, u mor në pyetje për mbështetjen e studentëve. 
Kur studentët e vendosën në krye të listës me 250 kandidatë, ai deklaroi për Nova.rs se ndihej krenar për besimin e tyre, por e konsideronte veten vetëm të parin mes të barabartëve. Madje, këmbënguli se angazhimi politik nuk do ta largonte nga profesioni i mjekut. 
Kjo është edhe veçantia e kandidaturës së tij. Lista Studentore nuk mbështetet te një politikan tradicional, por te një figurë e ardhur nga mjekësia dhe universiteti, e përzgjedhur nga një lëvizje që për gati dy vjet ka kërkuar llogaridhënie për korrupsionin dhe funksionimin e institucioneve.
Më 25 tetor, Srdanoviç përfaqëson në fletën e votimit kalimin e protestës studentore nga rruga në garën për Parlamentin e Serbisë. Rezultati zgjedhor do të përcaktojë peshën që kjo lëvizje do të ketë në institucionet e vendit.
