Propozimi i Gazment Bardhit për ngujimin e grupit parlamentar të PD-së, për të mos "dorëzuar" Ervin Salianjin, është padyshim një përpjekje për të zhvendosur narrativën nga Berisha tek selia e drejtuar nga Bardhi.
Ideja e hedhur në mbledhjen e sotme duket se i ka gjetur të papërgatitur deputetët e tjerë, të cilët në parim kanë mbështetur propozimin e Gazment Bardhit. Dhe, në pamje të parë, solidariteti është reagimi më normal i deputetëve që me të drejtë kundërshtojnë vendimin për burgosjen e kolegut të tyre.
Por në një këndvështrim afatgjatë, ky vendim e ndan aksionin politik dhe vëmendjen në dy kampe, të dyja me qëllim kundërshtimin e vendimit të institucioneve të drejtësisë. Në betejën e parë, që zgjat prej një viti, militantë dhe mbështetës mblidhen çdo ditë për të kundërshtuar, sharë dhe telendisur SPAK në rrugicën e Shpresës. Beteja politike personale e Berishës është shndërruar, duam apo jo, në betejën e PD-së, që mesa duket, Gazment Bardhit nuk i shkon për shtat për shkak të protagonizmit të tij që është në hije.
Për këtë arsye, ndoshta propozimi i tij do të krijojë një front të ri opozitar brenda selisë, ku deputetët e ngujuar dhe kryetari i grupit do të kenë të plotë, dhe pa hijen e Berishës, selinë dhe aksionin politik.
Ky "kurth" i ëmbël duket se ka mbështetjen e deputetëve të lënë pas dore nga Berisha dhe që e shohin këtë vendim si momentin e fundit ku mund të rishfaqin fuqinë e tyre opozitare. Përndryshe, listat që Berisha do të hartojë do të jenë thjesht dëshira e kryetarit, ku kontributet do të hidhen në thesin e 30 viteve të fundit.
Mbetet për t’u parë se çfarë vendimi do të marrë grupi parlamentar i PD-së, që padyshim mund t'i pëlqejnë idetë e Gazment Bardhit, por nuk do të mund të vendosë jashtë vullnetit të Berishës, i cili gjithsesi ka nevojë për vëmendje dhe fushëbetejë të paeklipsuar nga ish-garda e Lulzim Bashës.
