Elvis Gacaj, i njohur për lidhjet e tij të ngushta me krerët e klanit kriminal Duka, u arrestua sot nga Policia e Tiranës pasi lëvizte me armë pa leje. Sipas policisë, 50-vjeçari u prangos në kuadër të operacionit të koduar “Again”. Gjatë këtij operacioni, shërbimet e Policisë ndaluan një automjet tip “Volkswagen”, me drejtues shtetasin M.D. dhe pasagjer Elvis Gacajn.
“Gjatë kontrollit fizik të shtetasit Elvis Gacaj, shërbimet e Policisë ‘Shigjeta’ gjetën dhe sekuestruan një armë zjarri pistoletë, municion luftarak dhe një sasi lënde narkotike kanabis,” njoftoi policia. Ndërsa shtetasi M.D. u arrestua për veprën penale të moskallëzimit të krimit.
Gacaj është një emër i njohur për policinë shqiptare, pasi është skeduar për vepra të rënda penale. Në vitin 2018, ai u arrestua së bashku me Leonard Dukën, kreun e klanit kriminal Duka, në një apartament pranë shkollës “Partizani”. Por më pas, gjykata vendosi ta lërë në arrest shtëpie.
Më herët, më 1 tetor 2015, ai i shpëtoi një atentati mafioz, kur automjeti me të cilin udhëtonte u qëllua me breshëri kallashnikovi, një ngjarje ku dy miqtë e tij mbetën të vrarë. Gacaj është dyshuar edhe për përfshirje në kultivimin e kanabisit në zonën e Shëngjergjit.
