Një 27-vjeçar ka rënë në prangat e Policisë së Kamzës, pasi mbrëmjen e djeshme ka qëlluar me pistoletë në ajër, pas një konflikti të çastit. Sipas policisë i riu është me precedent të mëparshëm penalë për mashtrim. “Shërbimet e Komisariatit të Policisë Nr. 5, menjëherë pas marrjes së njoftimit se në rrugën “Besëlidhja”, një shtetas kishte qëlluar me armë zjarri, në ajër, kanë organizuar dhe finalizuar operacionin policor të koduar “Moment”, për kapjen e tij. Si rezultat i veprimeve të shpejta, u kap dhe u arrestua shtetasi F. H., 27 vjeç, banues në Domje, me precedent të mëparshëm penal në fushën e mashtrimit”, njofton Policia. Policia thekson se 27-vjeçari dyshohet se “pas një konflikti për motive të dobëta me shtetasin A. H., ka qëlluar me armë zjarri pistoletë, në ajër, dhe më pas është larguar nga vendi i ngjarjes”.
