Ilir Meta, ka dorëzuar rekurs në Gjykatën e Lartë përmes përfaqësuesit të tij ligjor, avokat Genc Gjokutaj, duke kundërshtuar masën e sigurisë “arrest me burg” të caktuar ndaj tij nga GjKKO dhe të miratuar më pas nga Apeli.
Avokati Gjokutaj deklaroi se vendimi i marrë bazohet mbi dëshmitarë të rremë dhe prova të marra në kundërshtim me ligjin. Sipas tij, në çështjet që lidhen me lobimin në SHBA, deklarimin e pasurisë dhe rastin ÇEZ-DIA, mungojnë provat dhe dyshimi i arsyeshëm për ndonjë shkelje.
Gjokutaj u shpreh:
“Ne kemi paraqitur rekursin në Gjykatën e Lartë, duke argumentuar për revokimin e masës së sigurisë ‘arrest me burg’. Dokumentet e dorëzuara tregojnë qartësisht se në asnjë nga tre episodet e përmendura nuk ka elementë penalë apo dyshime të bazuara. Për lobimin në SHBA dhe deklarimin e pasurisë, gjithçka është e sqaruar dhe ligjërisht e rregullt. Ndërsa për çështjen ÇEZ-DIA, vendimi mbështetet në dëshmitarë të rremë dhe procedura të paligjshme.”
Meta, përmes përfaqësuesit të tij ligjor, kërkon nga Gjykata e Lartë revokimin e vendimit, duke pretenduar se masa e sigurisë është e pabazuar dhe e padrejtë.
