Drejtuesit e policisë shprehin shqetësimin dhe habinë se komunikimi mes institucioneve ka ndodhur nëpërmjet medias. Por, ndërkohë sipas tyre, nuk ka pasur ndonjë gjë shqetësuese. Në komunikatën e policisë thuhet: “DVP Tiranë thekson se nuk ka marrë asnjë njoftim në formë shkresore apo verbale, apo telefonatë të drejtuar në Sallën e Menaxhimit dhe Drejtimit në Drejtorinë Vendore të Policisë Tiranë, ku punonjës të Gardës së Republikës apo ndonjë entitet tjetër, të kenë njoftuar për cenim të rendit dhe sigurisë publike, apo paligjshmëri të tjera pranë dhe përreth godinës së Gjykatës së Posaçme.”
Me pak fjalë, në Drejtorinë e Policisë së Tiranës nuk ka as TV dhe as internet që të mund të shohë dhe të njihet me situatën në një nga institucionet me rëndësi të veçantë si SPAK dhe Gjykata e Posaçme. Madje për orë të tëra, asnjë drejtues i policisë nuk ka parë apo dëgjuar se mbështetës të Erjon Velisë janë mbledhur para godinave të SPAK dhe GJKKO.
Edhe sikur të jetë e vërtetë që Garda nuk ka njoftuar policinë, si është e mundur që asnjë drejtues nuk ka komunikuar për të parë dhe kontrolluar situatën? Si ka mundësi që nuk ka pasur asnjë shqetësim për të marrë informacion për një ngjarje, e cila transmetohej live nga të gjitha mediat? Mesa duket, drejtuesit e Policisë së Shtetit kanë pasur gjëra më të rëndësishme për të bërë në orët kur e gjithë vëmendja e publikut ishte përqendruar në një ngjarje dhe në një vend: godina e SPAK dhe GJKKO.
Do të ishte në nderin e drejtuesve të Policisë së Shtetit që të paktën të kërkonin ndjesë për incidentet e ndodhura dhe të mos hynin në një debat të pakuptimtë, në mos të qëllimshëm, me SPAK dhe GJKKO. Gjithmonë, nëse u ka mbetur ndonjë fije dinjitet dhe profesionalizëm.
