Ish-kryetari i Bashkisë së Tiranës, Erion Veliaj, ka reaguar nga qelia, duke hedhur akuza ndaj prokurorisë për një proces të njëanshëm dhe të padrejtë kundër tij. Në një mesazh publik, Veliaj deklaron se ndodhet ende në fazën e personit të dyshuar, pasi organi i akuzës nuk ka arritur ta marrë të pandehur për mungesë provash.
“Nuk ka asnjë fakt që të vërtetojë se kam marrë apo kërkuar ryshfet. Nuk është gjetur asnjë shumë e pajustifikuar. E megjithatë, më akuzojnë për korrupsion,” shprehet ai.
Veliaj përqendrohet te një nga akuzat kryesore, që lidhet me fustanet e bashkëshortes së tij, duke shpjeguar se kjo është një çështje e fabrikuar nga kundërshtarët e tij politikë.
"Se për 1 milion Euro mall duhet një dyqan si ai i brekëve dhe sutjenave të nuses së Sali fundërrinës në Bllok apo jo?
Përderisa edhe lavamanët i shkulën nga vendi në gjithë ambientet në Tiranë e në Golem, për të kërkuar ndonjë varëse floriri të fshehur, në mure e dysheme, ku dihet botërisht se jetojmë në pallat të ndërtuar në vitin 2012 (kam hyrë në atë apartament kohë më parë se sa të bëhesha kryetar bashkie, leje e Komunës Farkë e Bardh Plakut, as e dhënë nga unë vetë), atëherë duhet t’i kishin provat materiale besoj, apo jo?
Kanë blerjet online do thoni ju.
Por, ja që e vërteta nuk është ashtu si thotë prokurori i fiksuar pas fustanëve të gruas time, që gjatë intervistës më tregonte se si kontrollonte gruan e tij dhe më pyeti edhe “çfarë hamë?”." shkruan Veliaj
Ai akuzon prokurorin Ols Dado për njëanshmëri dhe pretendon se ky i fundit ka përdorur funksionin e tij për përfitime personale. Gjithashtu, ai kritikon ashpër gjyqtarin e çështjes, duke e cilësuar si të njëanshëm dhe të orientuar politikisht.
