Aktakuza e Prokurorisë Speciale të Kosovës ndaj Fatmir Shehollit nxjerr në dritë një nga pjesët më të ndjeshme të dosjes: një dokument të quajtur “Leptiri”, që sipas organit të akuzës është përpiluar nga struktura të Sigurimit Shtetëror të Serbisë dhe kishte si objektiv komprometimin dhe rekrutimin e Albin Kurtit, në kohën kur ai mbahej në burgjet serbe.
Në aktakuzën e datës 24 gusht 2026, Prokuroria Speciale e Kosovës thotë se gjatë analizimit të telefonit celular të sekuestruar të Fatmir Shehollit është gjetur një dokument i emërtuar “Leptiri”. Sipas dosjes, ky dokument ishte pjesë e materialeve që lidhen me strukturat serbe të sigurisë.
“Nga analiza e dëshmisë Z#4.1, përkatësisht dokumentit të emërtuar ‘Leptiri’, të gjetur në telefonin e të pandehurit Fatmir Sheholli, rezulton se bëhet fjalë për një dokument i përpiluar nga struktura të Sigurimit Shtetëror të Serbisë (RDB) në vitin 2001, i cili përshkruan një plan operativ për komprometimin dhe rekrutimin e Albin Kurtit gjatë kohës së vuajtjes së dënimit në burgjet e Serbisë”, thuhet në aktakuzë.
Sipas Prokurorisë, plani parashikonte përdorimin e një burimi operativ me nofkën “Leptiri”, për të siguruar materiale komprometuese ndaj Kurtit.
Në dosje thuhet se qëllimi i këtij plani ishte ushtrimi i presionit ndaj tij për bashkëpunim me strukturat serbe.
“Sipas përmbajtjes së dokumentit, parashihej përdorimi i një burimi operativ me nofkën ‘Leptiri’ për sigurimin e materialeve komprometuese, me qëllim të ushtrimit të presionit ndaj tij për bashkëpunim me RDB-në”, citohet në aktakuzë.
Pjesa më e rëndë e kësaj dosjeje lidhet me pretendimin e Prokurorisë se dokumenti nuk ishte thjesht i ruajtur në telefonin e Shehollit, por edhe ishte shpërndarë prej tij te persona të tjerë. Sipas aktakuzës, nga analizimi i komunikimeve të nxjerra nga telefoni rezulton se Sheholli e kishte përcjellë dokumentin te disa persona dhe kishte kërkuar edhe përkthimin e tij nga serbishtja në shqip.
“Nga analizimi i komunikimeve të nxjerra nga telefoni i të pandehurit rezulton se ai e ka përcjellë këtë dokument te persona të ndryshëm, si dhe ka kërkuar përkthimin e tij nga gjuha serbe në gjuhën shqipe”, thuhet më tej në dosje.
Prokuroria e lidh këtë veprim me pretendimet për kontaktet dhe bashkëpunimin e Shehollit me persona dhe struktura të ndërlidhura me shërbimet serbe të sigurisë.
“Këto veprime, të vlerësuara së bashku me komunikimet dhe materialet e tjera të evidentuara në telefonin e të pandehurit, janë relevante për të dëshmuar kontaktet, lidhjet dhe bashkëpunimin e tij me persona dhe struktura të ndërlidhura me shërbimet e sigurisë serbe, si dhe rolin e tij në përcjelljen dhe shpërndarjen e materialeve me origjinë nga këto struktura”, vlerëson Prokuroria.
Në aktakuzë përfshihet edhe një pjesë nga dëshmia e vetë Shehollit, ku ai pyetet për prejardhjen e dokumentit “Leptiri”. Sipas dosjes, Sheholli ka deklaruar se dokumentin ia kishte dërguar Bojan Dimiç.
“Këtë dokument ma ka dërgu Bojan Dimiç në telefonin tim”, citohet të ketë deklaruar Sheholli.
I pyetur nga prokurori se kujt ia kishte shpërndarë dokumentin, Sheholli, sipas aktakuzës, ka përmendur disa emra.
“Këtë ia kam dërgu Milazim Gashit, një mikut tim i cili është në SHISH të Shqipërisë me emrin Dritan Gjoni – Shef i SHISH-it në Durrës, ja kam dërgu Blerim Canaj dhe një personi me emrin Bashkim Pushkolli por nuk jam i sigurt a ia kam dërgu”, thuhet në aktakuzë, duke cituar deklarimin e të pandehurit.
Dokumenti “Leptiri” përmendet nga Prokuroria si një nga provat që, sipas saj, tregon rolin e Shehollit në pranimin dhe shpërndarjen e materialeve të ardhura nga struktura serbe.
E rëndësishme është se në këtë pjesë të aktakuzës, Albin Kurti nuk del si i akuzuar apo i dyshuar, por si objektiv i një plani të pretenduar të strukturave serbe për komprometim dhe rekrutim gjatë periudhës kur ai mbahej në burgjet e Serbisë.
Aktakuza ndaj Fatmir Shehollit përfshin dy vepra penale kryesore: “Spiunazh” dhe “Shantazh”. Për veprën e parë, Prokuroria pretendon se ai ka vepruar si person i rekrutuar nga shërbimi informativ serb BIA, duke mbledhur, siguruar dhe përcjellë të dhëna e materiale që, sipas akuzës, dëmtonin interesat shtetërore të Kosovës.
